АСТАНА. ҚазАқпарат – Қазақстанның бірінші, әлемнің 46-ракеткасы Александр Бублик Дубай ATP 500 турнирін жеңіспен бастады, деп хабарлайды ҚазАқпарат тілшісі.
Қазақстандық теннисші бастапқы кездесуін дүниежүзілік рейтингте 301-орында тұрған болгариялық Александр Лазаровпен өткізді.
Бірінші партияда А.Бублик айқын басымдылық танытты – 6:1.
Екінші сетте есеп 0:1 болған мезетте болгариялық спортшы бәсекені жалғастырудан бас тартты.
Жарты сағатқа жуық уақытқа созылған матчта А.Бублик 3 эйс жасап, 5 брейк-пойнттың үшеуін пайдаланып үлгерді.
А.Бублик екінші айналымда әлемнің 7-ракеткасы, ресейлік Даниил Медведевпен шеберлік байқасады. Ол рейтингте 111-орындағы италиялық Маттео Арнальдидді жолдан тайдырды – 6:4, 6:2.
Дубай додасы 4 наурызда мәресіне жетеді.
Еске сала кетейік, бұдан бұрын үш қазақстандық теннисшінің жұптық сында Астанадағы турнирдің ширек финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).