ДУБАЙ. KAZINFORM – Қазақстанның бірінші, әлемнің 23-ракеткасы Александр Бублик Дубай ATP 500 турнирінің ширек финалына өтті.
Жарыстың 7-ракеткасы болып тіркелген қазақстандық теннисші екінші айналымда дүниежүзілік рейтингіде 28-орында тұрған нидерландылық Таллон Грикспормен сынға түсті.
Матчтың тартысты өткені сондай, екі сет те тай-брейкпен аяқталды. Онда А.Бублик 7:6 (10:8), 7:6 (7:2) есебімен басымдылық танытты.
Екі сағатқа жуық уақытқа созылған бәсеке барысында қазақстандық спортшы 22 эйс жасап, 2 брейк-пойнттың біреуін пайдаланды. Т.Грикспор 7 эйс, 1 брейкпен (4 брейк-пойнт) көзге түсті.
Александр Бублик жүлде қоры 2,9 млн АҚШ долларына бағаланған доданың жартылай финалына шығу үшін әлемнің 15-ракеткасы, ресейлік Карен Хачанов немесе рейтингіде 38-сатыдағы чехиялық Иржи Лехечканың біреуімен таласады.
А.Бублик қазіргі кезде ATP Live рейтингісінде қайтадан 21-орынға көтеріліп тұр.
Еске сала кетейік, бұдан бұрын Александр Шевченконың Дубайда жарыстың 1-ракеткасына жол бергенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).