ЛИОН. KAZINFORM - Қазақстанның бірінші, әлемнің 19-ракеткасы Александр Бублик Лион (Франция) ATP 250 турнирінің жартылай финалына шықты.
Жарыстың 2-ракеткасы болып тіркелген қазақстандық теннисші ширек финалда дүниежүзілік рейтингіде 57-орында тұрған ресейлік Павел Котовпен аса тартысты кездесу өткізді.
Бірінші партияда ресейлік спортшы тай-брейкте басымдылық танытты - 7:6 (7:4). Екіншісінде Бублик дәл сондай есеппен есе қайырды - 7:6 (7:4).
Үшінші, шешуші сетте Бублик жеңісті жұлып алды - 6:3.
Үш сағат 10 минутқа созылған бәсеке барысында Бублик 11 эйс жасап, 8 брейк-пойнттың бесеуін пайдаланды. Котов 3 эйспен бірге 17 брейк-пойнттың төртеуін ғана өз есебіне жазды.
Александр Бублик финалға шығу үшін франциялықтар, әлемнің 104-ракеткасы Юго Гастон немесе рейтингіде 117-сатыдағы Джованни Мпетчи Перрикардың біреуімен таласады.
Еске сала кетейік, бұдан бұрын Қазақстан жасөспірімдер құрамасының екінші жыл қатарынан әлем чемпионатына жолдама алғанын жазған болатынбыз.
Сондай-ақ Тимофей Скатов Германиядағы жарыстың жартылай финалына өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).