АСТАНА. ҚазАқпарат – Қазақстанның бірінші, әлемнің 48-ракеткасы Александр Бублик Галле (Германия) ATP 500 турнирінің екінші айналымына шықты, деп хабарлайды ҚазАқпарат тілшісі.
Қазақстандық теннисші бастапқы кездесуін әлемнің 14-ракеткасы, хорватиялық Борна Чоричпен өткізді.
Бірінші партияда А.Бублик 4:1 есебімен алға кетіп, сол басымдылығын сақтап қалды – 6:3.
Екінші сетте қазақстандық спортшы қарқынын үдете түсті – 6:1.
Бір сағаттан астам уақытқа созылған бәсеке барысында Бублик 15 эйс жасап, 10 брейк-пойнттың төртеуін өз есебіне жазды. Б.Чорич 1 эйстен аса алмады.
Александр Бублик ширек финалға шығу үшін әлемнің 21-ракеткасы, германиялық Ян-Леннард Штруфф немесе рейтингте 99-орындағы ресейлік Роман Сафиуллиннің біреуімен таласады.
Бір қызығы, А.Бублик Б.Чоричпен бірге жұптық сында алғашқы айналымда италиялықтар Симоне Болелли – Андреа Вавассориден жеңіліп қалған болатын – 1:6, 6:2, 9:11.
Еске сала кетейік, бұдан бұрын қазақстандық жас теннисшілердің халықаралық турнирлерде табысты өнер көрсеткенін жазған болатынбыз.
Сондай-ақ Елена Рыбакина Берлин турнирін жеңіспен бастады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).