АСТАНА. ҚазАқпарат - Қазақстанның бірінші, әлемнің 48-ракеткасы Александр Бублик Галле (Германия) ATP 500 турнирінің ширек финалына шықты, деп хабарлайды ҚазАқпарат тілшісі.
Қазақстандық теннисші екінші айналымда әлемнің 21-ракеткасы, германиялық Ян-Леннард Штруфпен шеберлік байқасты.
Бірінші партияда А.Бублик 6:3 есебімен басымдылық танытты.
Екіншісінде германиялық спортшы тай-брейкте есе қайырды - 7:6 (7:4).
Үшінші, шешуші сетте қазақстандық теннисші жеңісті жұлып алды - 6:3.
Екі сағат 14 минутқа созылған кездесуде Бублик 23 эйс жасап, 14 брейк-пойнттың төртеуін пайдалана білді. Қарсыласы 14 эйс, 2 брейкпен көзге түсті.
Александр Бублик жартылай финалға шығу үшін әлемнің 9-ракеткасы, италиялық Янник Синнермен таласады.
Ол екінші айналымда отандасы Лоренцо Сонегоны сүріндірді - 6:7 (4:7), 6:4, 6:4.
Еске сала кетейік, бұдан бұрын Анна Данилинаның жұптық сында Берлин турнирінің ширек финалына өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).