АСТАНА. KAZINFORM — Қазақстанның бірінші, әлемнің 20-ракеткасы Александр Бублик Индиан-Уэллс мастерс турнирінің үшінші айналымына өтті.
Жарысты екінші айналымнан бастаған қазақстандық теннисші дүниежүзілік рейтингіде 139-орында тұрған қытайлық Цзюнчэн Шанмен сынға түсті.
Тартысты өрбіген бірінші партияны А.Бублик брейкпен тәмамдады – 6:4.
Қазақстандық спортшы екінші сетте қарқынын үдетіп, есепті 4:0-ге жеткізді. Ақыры матчты жеңіспен аяқтау қиынға түскен жоқ – 6:1.
Бір сағаттан астам уақытқа созылған бәсеке барысында Бублик 10 эйс жасап, 5 брейк-пойнттың төртеуін мүлт жіберген жоқ. Шан 1 брейкпен (4 брейк-пойнт) шектелді.
А.Бубликтің үшінші айналымдағы қарсыласы әлдеқайда мықты. Қазақстандық теннисші әлемнің 10-ракеткасы, аустралиялық Алекс де Минормен кортқа шығады.
Қазіргі сәтте Александр Бублик ATP Live рейтингісінде 18-орынға көтеріліп тұр.
Еске сала кетейік, бұдан бұрын қатарынан 22 матчта жеңіске жеткен Дмитрий Попконың Бразилияда жартылай финалға өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).