АСТАНА. ҚазАқпарат – Қазақстанның бірінші, әлемнің 28-ракеткасы Александр Бублик Торонто (Канада) мастерс турнирінің екінші айналымына шыға алмады, деп хабарлайды ҚазАқпарат тілшісі.
Қазақстандық теннисші алғашқы айналымда әлемнің 17-ракеткасы, Польша өкілі Хуберт Гуркачпен кездесті.
Поляк теннисшісі 6:3, 7:6 (7:2) есебімен жеңіске жетті.
Бір сағаттан астам уақытқа созылған бәсеке барысында Бублик 10 эйс жасап, 3 брейк-пойнттың екеуін пайдаланды. Қарсыласы 7 эйс, 4 брейкпен (7 брейк-пойнт) көзге түсті.
А. Бублик жүлде қоры 6,6 млн АҚШ долларына бағаланған жарыстың жұптық сынында да өнер көрсетеді. Ол франциялық Адриан Маннариномен бірге алғашқы айналымда франциялық Фабрис Мартен – германиялық Андреас Мьеспен шеберлік байқасады.
Қазақстанның әйелдер арасында жұптық сындағы бірінші, әлемнің 25-ракеткасы Анна Данилинаның Монреаль мастерс додасындағы қадамы сәтсіз болды. Ол америкалық Бетани Маттек-Сандспен бірге чехиялықтар Каролина Мухова – Маркета Вондроушоваға жол берді – 6:0, 4:6, 4:10.
Еске сала кетейік, бұдан бұрын Елена Рыбакинаның әлемдік рейтингте үздік үштіктен тыс қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).