АСТАНА. KAZINFORM — Қазақстанның бірінші, әлемнің 75-ракеткасы Александр Бублик Мадрид мастерс турнирін жеңіспен бастады.
Қазақстандық теннисші алғашқы айналымда әлемнің 38-ракеткасы, америкалық Алекс Михельсеннің мысын басты.
Бірінші партияда америкалық спортшы есеп 5:4 болған мезетте сетке доп бергенімен, сол мүмкіндігін мүлт жіберді. Тай-брейкте Бубликтің асығы алшысынан түсті — 7:6 (7:2).
Екінші сетте де қазақстандық теннисші тай-брейкте таразы басын өзіне аударды — 7:6 (7:4).
Бір сағат 47 минутқа созылған тартысты бәсеке барысында Александр Бублик 11 эйспен бірге 8 брейк-пойнттың тек біреуін пайдаланды. Михельсен 1 эйс, 1 брейкпен (9 брейк-пойнт) көзге түсті.
Александр Бублик үшінші айналымға шығу үшін әлемнің 26-ракеткасы, аустралиялық Алексей Попыринмен шеберлік таластырады.
Өткен жылы Александр Бублик Мадридте төртінші айналымға дейін жеткен еді.
Еске сала кетейік, бұдан бұрын Тимофей Скатовтың Рим турнирінің ширек финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).