НҰР-СҰЛТАН. ҚазАқпарат - Қазақстанның бірінші, әлемнің 42-ракеткасоы Александр Бублик Ньюпорт (АҚШ) ATP 250 турнирінің финалында жеңіліп қалды, деп хабарлайды ҚазАқпарат тілшісі.
Қазақстандық теннисші осыған дейін бес рет ATP додаларының финалында ойнап, тек соның біреуінде ғана, биыл Монпельеде чемпион атанған еді.
Бұл жолы финалда әлемнің 41-ракеткасы, америкалық Максим Крессимен бас жүлдені сарапқа салды.
Бірінші партия барысында қос брейк жасаған қазақстандық теннисші басымдылық көрсетті - 6:2.
Екінші сетте де 3:0 есебімен алға кеткенімен, қатарынан алты геймді беріп қойды - 3:6.
Үшінші, шешуші партияда матч тағдыры тай-брейкте шешіліп, америкалық жеңіске жетті - 7:6 (7:3).
Осылайша, А.Бублик Ньюпорт турнирінің финалында екінші рет ұтылып отыр. 2019 жылы тағы бір америкалық Джон Изнерге есе жіберген еді.
Еске сала кетейік, бұдан бұрын Қазақстанның жасөспірім теннисшілері Еуропадағы турнирлерде жеңімпаз атанғанын, Бейбіт Жукаевтың елордадағы жарыстың финалына дейін жеткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).