АСТАНА. ҚазАқпарат – Қазақстанның бірінші, әлемнің 25-ракеткасы Александр Бублик Вашингтон ATP 500 турнирінің үшінші айналымына шыға алмады, деп хабарлайды ҚазАқпарат тілшісі.
Жарысты екінші айналымнан бастаған қазақстандық теннисші кезінде әлемдік рейтингте 6-орынға дейін көтерілген, қазір 323-орында тұрған франциялық Гаэль Монфиспен ойнады.
Тәжірибелі Г.Монфис 6:3, 6:4 есебімен жеііске жетті.
Бір сағат 23 минутқа созылған бәсеке барысында Бублик 3 эйс жасап, 6 брейк-пойнттың біреуін ғана пайдаланды. Франциялық спортшы 5 эйс, 3 брейкпен (10 брейк-пойнт) көзге түсті.
Жүлде қоры 1,9 млн АҚШ долларына бағаланған доданың ширек финалына шығу үшін Г.Монфис әлемнің 37-ракеткасы, нидерландылық Таллон Грикспурмен таласады.
А.Бублик Т.Грикспурмен бірге жұптық сында алғашқы айналымда-ақ америкалықтар Маккензи Макдональд – Бен Шелтонға жол берді – 4:6, 6:7 (4:7).
Еске сала кетейік, бұдан бұрын Александр Недовесовтің Аустриядағы турнирдің ширек финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).