АСТАНА. KAZINFORM — Қазақстанның ерлер арасында бірінші, әлемнің 33-ракеткасы Александр Бублик Аделаида (Аустралия) ATP 250 турнирінде бақ сынайды.
Бұл қазақстандық теннисшінің жаңа маусымдағы алғашқы жарысы болмақ.
Жаңа жылды өзінің отбасымен қарсы алып, Аустралияға аттанған А.Бублик Аделаидада бастапқы кездесуін әлемнің 54-ракеткасы, сербиялық Миомир Кецмановичпен өткізеді.
Бұл доданың жүлде қоры — 766 290 доллар.
Жүлде қоры 1 млн доллардан асатын әйелдер арасында Аделаида WTA 500 турниріне Қазақстанның екінші, әлемнің 29-ракеткасы Юлия Путинцева қатысады. Оның алғашқы қарсыласы — әлемнің 19-ракеткасы, Париж Олимпиадасының күміс жүлдегері, хорватиялық Донна Векич.
Екі жарыс та 6-11 қаңтар аралығында өтеді.
Еске сала кетейік, бұдан бұрын Қазақстан құрамасының United Cup турнирінің финалынан тыс қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).