АСТАНА. KAZINFORM — Қазақстанның бірінші, әлемнің 11-ракеткасы Александр Бублик іріктеу сайыстары өтіп жатқан Женева (Швейцария) ATP 250 турнирінде өнер көрсетеді.
Қазақстандық теннисші аталмыш жарыста 2-ракетка болып тіркелген.
Доданы екінші айналымнан бастайтын А.Бублик әлемнің 66-ракеткасы, италиялық Лоренцо Сонего немесе іріктеу сайысы жеңімпаздарының бірімен кездеседі.
Осыған дейін Женевада екі рет бақ сынаған А.Бублик алғашқы айналымнан аса алмаған.
Жарыстың жүлде қоры 612 620 еуроға бағаланған. Турнир чемпионы 93 175 еуроға қоса 250 рейтингілік ұпайға қол жеткізеді.
Өткен жылы мұнда әлемнің 4-ракеткасы, «Үлкен дулыға» турнирлерінің 24 дүркін чемпионы, сербиялық Новак Джокович үздік шыққан.
Биыл әлемдік рейтингіде 7-орында тұрған америкалық Тейлор Фриц Женевада 1-ракетка болып тіркелген.
Еске сала кетейік, бұдан бұрын Шымкентте жасөспірімдер құрамалары арасында Билли Джин Кинг кубогының іріктеу турнирі аяқталғанын жазған едік.
Сондай-ақ Юлия Путинцева Страсбург турнирін сәтті бастады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).