АСТАНА. KAZINFORM — Қазақстандық теннисші Александр Бублик жұптық сында Дубай АТР 500 турнирін жеңіспен бастады.
А.Бублик қытайлық Цзючжэн Шанмен бірге алғашқы айналымда тайбэйлік Рэй Хо — германиялық Хендрик Йебенске тап келді.
Бірінші партияда тайбэйлік-германиялық дуэт ептілік танытты — 6:4.
Екінші сетте Бублик — Шан дәл сондай есеппен есе қайырды — 6:4. Содан кейін супер тай-брейкте жеңісті жұлып алды — 12:10.
Бір сағат 12 минутқа созылған бәсекеде қазақстандық-қытайлық жұп 8 эйспен бірге 1 брейк-пойнтты пайдалана білді. Хо — Йебенс 9 эйс, 1 брейкпен (6 брейк-пойнт) ерекшеленді.
А.Бублик — Ц.Шанның ширек финалдағы қарсыластары кейін белгілі болады.
Қазақстандық теннисші осы додада жекелей сында 2-ракетка ретінде тіркелген. Оның бастапқы қарсыласы — германиялық Ян-Леннард Штруфф.
Еске сала кетейік, бұдан бұрын Анна Данилинаның әлемдік рейтингіде өзінің рекордын қайта жаңартқанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).