АСТАНА. KAZINFORM — Қазақстанның жұптық сындағы бірінші, әлемнің 54-ракеткасы Александр Недовесов Китцбюэль (Аустрия) ATP 250 турнирінің ширек финалына жолдама алды.
Жарыстың 4-ракеткасы болып тіркелген қазақстандық теннисші эквадорлық Гонсало Эскобармен бірге алғашқы айналымда сербиялықтар Иван Сабанов — Матей Сабановпен сынға түсті.
А.Недовесов — Г.Эскобар қарсыластарын 6:3, 6:3 есебімен тізе бүктірді.
Бір сағаттан сәл астам уақытқа созылған бәсеке барысында қазақстандық-эквадорлық жұп 1 эйспен бірге 11 брейк-пойнттың алтауын пайдаланды.
Сербиялықтар 2 эйс, 3 брейктен (6 брейк-пойнт) аса алмады.
Александр Недовесов — Гонсало Эскобар жартылай финалға өту үшін доданың 5-ракеткалары, германиялықтар Хендрик Йебенс — Константин Франценмен шеберлік таластырады.
Еске сала кетейік, бұдан бұрын Анна Данилинаның Румыниядағы жарыстың ширек финалына жолдама алғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).