Қазақстанның жұптық сындағы бірінші, әлемнің 49-ракеткасы Александр Недовесов София (Болгария) ATP 250 турнирінің ширек финалына жолдама алды, деп хабарлайды Kazinform.
Қазақстандық теннисші эквадорлық Гонсало Эскобармен бірге алғашқы айналымда жарыстың 4-ракеткалары, аустриялықтар Александр Эрлер – Лукас Мидлермен кортқа шықты.
Қазақстандық-эквадорлық жұп 7:5, 6:2 есебімен жеңіске жетті. Бір сағаттан астам уақытқа созылған бәсеке барысында олар 3 эйс, 3 брейкпен көзге түсті.
Александр Недовесов – Гонсало Эскобар жартылай финалға шығу үшін болгариялықтар Янаки Милев – Петр Нестеровпен шеберлік таластырады.
Тағы бір қазақстандық Андрей Голубев украиналық Денис Молчановпен бірге ширек финалда аустралиялықтар Джон Патрик Смит – Макс Перселден өтуге тырысады.
Еске сала кетейік, бұдан бұрын атақты теннисшінің Қазақстан құрамасына ақ жол тілегенін жазған болатынбыз.
Сондай-ақ Денис Евсеев Хельсинки турнирінің екінші айналымына өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).