АСТАНА. ҚазАқпарат – Қазақстанның жұптық сындағы –бірінші, әлемнің 51-ракеткасы Александр Недовесов Ұлыбританиядағы Истбурн ATP 250 турнирінің жартылай финалына шыға алмады, деп хабарлайды ҚазАқпарат тілшісі.
Қазақстандық теннисші эквадорлық Гонсало Эскобармен бірге ширек финалда жарыстың 4-ракеткалары, хорватиялықтар Никола Мектич – Мате Павичпен шеберлік байқасты.
Бірінші партияда брейкпен алға шыққан хорватиялық жұп сол басымдылығын жоғалтқан жоқ – 6:4.
Екінші сетте де осы жағдай қайталанды – 6:4.
Бір сағаттан астам уақытқа созылған бәсеке барысында А.Недовесов пен Г.Эскобар 2 эйспен ғана шектелді. Қарсыластары 3 эйс жасап, 4 брейк-пойнттың екеуін пайдаланды.
А.Недовесов енді Уимблдон додасында бақ сынайды.
Еске сала кетейік, бұдан бұрын Александр Недовесовтің Истбурндағы жарыстың ширек финалына өткенін жазған болатынбыз.
Сондай-ақ Елена Рыбакина Уимблдонда чемпиондық атағын үшінші ракетка болып қорғайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).