Александр Недовесов Швециядағы жарыстың жартылай финалына шықты

АСТАНА. ҚазАқпарат - Қазақстанның жұптық сындағы бірінші, әлемнің 53-ракеткасы Александр Недовесов Бастад (Швеция) ATP 250 турнирінің жартылай финалына шықты, деп хабарлайды ҚазАқпарат тілшісі.

Қазақстандық теннисші эквадорлық Гонсало Эскобармен бірге ширек финалда сербиялықтар Никола Качич - Душан Лайовичпен шеберлік байқасты.

Бірінші партияда қазақстандық-эквадорлық жұп қос брейкке қол жеткізді - 6:1.

Тартыстылау өрбіген екінші сетті жеңіспен тәмамдады - 7:5.

Бір сағаттан астам уақытқа созылған матчта Г. Эскобар мен А. Недовесов 3 эйспен бірге 11 брейк-пойнттың төртеуін пайдалана білді.

Александр Недовесов пен Гонсало Эскобардың жартылай финалдағы қарсыластары кейін анықталады.

Еске сала кетейік, бұдан бұрын Елена Рыбакинаның эйстен әлемде көш бастағанын жазған болатынбыз.