АСТАНА. ҚазАқпарат – Қазақстанның жұптық сындағы бірінші, әлемнің 53-ракеткасы Александр Недовесов Илкли (Ұлыбритания) челленджер турнирінің жеңімпазы атанды, деп хабарлайды ҚазАқпарат тілшісі.
Жарыстың бірінші ракеткасы болып тіркелген А.Недовесов пен эквадорлық Гонсало Эскобар америкалық Роберт Гэллоуэй – аустралиялық Джон Патрик Смитпен бас жүлде үшін кортқа шықты.
Бірінші партияда америкалық-аустралиялық дуэт басымдылық танытты – 6:2.
Екінші сетте Недовесов пен Эскобар есе қайырды – 7:5.
Супер тай-брейкте А.Недовесов пен Г.Эскобар 1:4 есебімен жеңіліп жатып, таразы басын өздеріне аудара білді – 11:9.
Сағат жарымға созылған тартысты бәсекеде Александр мен Гонсало 5 эйспен бірге 6 брейк-пойнттың біреуін пайдаланды. Қарсыластары 3 эйс, 2 брейкпен (6 брейк-пойнт) көзге түсті.
Осылайша, қазақстандық-эквадорлық жұп чемпиондық атаққа қол жеткізді.
Еске сала кетейік, бұдан бұрын қазақстандық теннисшінің Ұлыбританиядағы турнирдің финалына шыққанын жазған болатынбыз.
Сондай-ақ Александр Бублик Германиядағы жарыстың жартылай финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).