АСТАНА. KAZINFORM – Қазақстанның екінші, әлемнің 102-ракеткасы Александр Шевченко Самтер (АҚШ) челленджер турнирінің жартылай финалына шықты.
Қазақстандық теннисші ширек финалда әлемнің 112-ракеткасы, грузиялық Николоз Басилашвилимен бетпе-бет келді.
Бірінші партияда грузиялық теннисшінің шеберлігі басым екені байқалды – 6:3. Екінші сетте тай-брейкте Шевченко табандылық танытты – 7:6 (7:3).
Үшінші, шешуші партияда есеп 4:1 болған кезде Басилашвили матчты жалғастырудан бас тартты.
Екі сағатқа созылған бәсекеде Шевченко 6 эйспен бірге 8 брейк-пойнттың бесеуін құр жібермеді. Грузиялық спортшы 6 эйс, 4 брейктен (7 брейк-пойнт) аса алмады.
Шевченко финалға шығу үшін әлемнің 120-ракеткасы, жапониялық Шинтаро Мочизукимен таласады. Ол ширек финалда рейтингіде 96-орындағы аустриялық Филип Мисоличті қапы қалдырды - 6:4, 4:6, 6:4.
Еске сала кетейік, бұдан бұрын Цинциннати турнирінде Елена Рыбакинаның әлемнің 1-ракеткасын жеңгенін жазған едік.
Сондай-ақ Тимофей Скатов Италиядағы турнирдің финалында ойнайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).