АСТАНА. KAZINFORM – Қазақстандық теннисші, әлемнің 96-ракеткасы Александр Шевченко Чэнду (Қытай) АТР 250 турнирінің екінші айналымына шықты.
А.Шевченко алғашқы айналымда франциялық белгілі теннисші, әлемнің 52-ракеткасы, 39 жастағы Гаэль Монфиске қарсы келді.
Бірінші партияда тай-брейкте Монфис сәтті ойнады – 7:6 (7:3). Екіншісінде Шевченко есе қайырды – 6:3.
Үшінші сетте есеп қазақстандық спортшының пайдасына 1:0 болған мезетте Г.Монфис матчты жалғастырудан бас тартты.
Бір сағат 49 минутқа созылған бәсекеде Шевченко 7 эйспен бірге 3 брейк-пойнттың екеуін мүлт жіберген жоқ. Монфис 3 эйс жасағанымен, 11 брейк-пойнттан ештеңе шығара алмады.
Александр Шевченко ширек финалға өту үшін әлемнің 36-ракеткасы, 22 жастағы франциялық Джованни Мпетчи Перрикармен таласады.
Еске сала кетейік, бұдан бұрын Билли Джин Кинг кубогында Қазақстанның АҚШ-қа жол бергенін жазған едік.
Денис Евсеев Қытайдағы турнирдің ширек финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).