АСТАНА. KAZINFORM — Қазақстанның екінші, әлемнің 104-ракеткасы Александр Шевченко Мюнхен (Германия) ATP 500 турнирінің екінші айналымына жолдама алды.
Қазақстандық теннисші іріктеу сайыстарының финалында жеңіліп қалғанымен, негізгі жарысқа шақырту алған еді.
А.Шевченко алғашқы айналымда әлемнің 36-ракеткасы, Италия өкілі Флавио Коболлиге қарсы келді.
Бірінші партияда тай-брейкте италиялық спортшыға сәттілік серік болды — 7:6 (7:2).
Есесіне бұдан кейін Шевченко камбэк жасай білді — 6:3, 6:4.
Екі сағат 40 минутқа созылған тартысты матчта Александр 5 эйспен бірге 12 брейк-пойнттың алтауын пайдаланды. Коболли 2 эйс, 4 брейкпен (21 брейк-пойнт) аса алмады.
Александр Шевченко ширек финалға шығу үшін әлемнің 22-ракеткасы, аргентиналық Франсиско Серундоломен таласады. Ол рейтингіде 51-орындағы германиялық Ян-Леннард Штруфты ойсырата ұтты — 6:0, 6:2.
А.Шевченко қазіргі кезде ATP Live рейтингісінде ТОП-100-ге қайта кіріп, 92-сатыға көтеріліп тұр.
Еске сала кетейік, бұдан бұрын Португалиядағы челленджер турнирінде Қазақстаннан екі теннисші өнер көрсететінін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).