АСТАНА. KAZINFORM — Қазақстанның екінші, әлемнің 107-ракеткасы Александр Шевченко Стокгольм (Швеция) АТР 250 турнирі іріктеу сайысының финалына шықты.
Іріктеудің 7-ракеткасы болып тіркелген қазақстандық спортшы бастапқы матчын әлемдік рейтингіде 482-орындағы норвегиялық Виктор Дурасовичпен өткізді.
Екі сет те 6:1, 6:1 есебімен А.Шевченконың пайдасына шешілді.
Бір сағатқа жетпейтін уақытқа созылған бәсекеде Шевченко 7 эйспен бірге 11 брейк-пойнттың бесеуін өз есебіне жазды. Дурасович 1 эйс жасап, 4 брейк-пойнтты пайдалана алмады.
Александр Шевченко іріктеу сайысының финалында әлемнің 90-ракеткасы, ұлыбританиялық Джекоб Фирнли немесе рейтингіде 337-сатыдағы франциялық Артур Нагельдің қай жеңгенімен кездеседі.
Стокгольм жарысының жүлде қоры 723 435 еуроға бағаланған.
Еске сала кетейік, бұдан бұрын Елена Рыбакинаның WTA қорытынды турнирі қарсаңында жанкүйерлерге сөз арнағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).