ЖЕНЕВА. KAZINFORM — Қазақстанның екінші, әлемнің 61-ракеткасы Александр Шевченко Женева (Швейцария) ATP 250 турнирінің екінші айналымына шықты.
Қазақстандық теннисші алғашқы айналымда әлемнің 41-ракеткасы, Мажарстан өкілі Фабиан Марожанмен шеберлік байқасты.
А.Шевченко Рим мастерс турнирінде Ф.Марожанды 6:3, 6:2 есебімен жеңген еді.
Бұл жолы бірінші партияда қазақстандық спортшы 6:4 есебімен басым түсті. Екіншісінде тай-брейкте матчты жеңіспен түйіндеді — 7:6 (7:4).
Сағат жарымға созылған бәсеке барысында Шевченко 6 эйспен бірге 4 брейк-пойнттың тең жартысын пайдаланды.
Марожан 2 эйс, 1 брейкпен (3 брейк-пойнт) шектелді.
Александр Шевченко ширек финалға шығу үшін әлемнің 48-ракеткасы, америкалық Маркос Хирон немесе рейтингіде 66-орында тұрған финляндиялық Емил Руусуворидің қай жеңгенімен таласады.
Еске сала кетейік, бұдан бұрын Александр Недовесовтің әлемдік рейтингіде рекордтық нәтижеге қол жеткізгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).