Әлем чемпионаты-2026: Бақтиер Зайнутдинов алдағы екі ойынға қатыса ала ма

АСТАНА. KAZINFORM — 2026 жылғы футболдан әлем чемпионатына іріктеу кезеңі аясындағы Қазақстан құрамасының алдағы екі кездесуіне қатыса алмайтын ойыншылар белгілі болды.

Қазақстан футбол федерациясының мәліметінше, Рамазан Кәрімов пен Роман Асранкулов алған жарақатына байланысты оқу-жаттығу жиынына қатыспайды. 

— Ал Бақтиер Зайнутдиновтің де жарақаты бар. Ол құрама сапына 17 наурызда қосылады. Қосымша медициналық қаралымнан өтеді. Сол арқылы алдағы ойындарға қатысу-қатыспауы туралы шешім қабылданады, — деп жазылған хабарламада.

Ел құрамасы 2026 жылғы Әлем чемпионатына іріктеу кезеңінде J тобында ойын көрсетеді. Қарсыластары — Бельгия, Уэльс, Солтүстік Македония және Лихтенштейн.

Матчтар 2025 жылдың наурызында басталып, қараша айында аяқталады.

Айта кетсек, Қазақстан құрамасы 22 наурызда сырт алаңда Уэльспен кездессе, 25 наурызда Лихтенштейнге қарсы ойнайды.

Еске салсақ, бұдан бұрын алдағы екі матчқа шақырту алған ойыншылардың нақты тізімін 
жарияланды.