Футзалдан Қазақстан құрамасы бүгін, 20 желтоқсанда әлем чемпионаты элиталық іріктеу сатысында соңғы ойынын Румынияға қарсы өткізді, деп хабарлайды Kazinform.
Ел құрамасы А тобында сынға түсті. Қарсыластары – Румыния, Әзербайжан және Нидерланд.
Алтыншы турда қазақстандық футзал шеберлері Румынияны 2:0 есебімен тізе бүктірді.
Ел құрамасынан Шыңғыс Есенаманов 8, Біржан Оразов 26-минутта мергендік танытты.
Ел құрамасы бұған дейін Румынияны 4:3, екі мәрте Нидерландты 2:0, 2:0, Әзербайжанды 4:2, 3:2 есебімен тізе бүктірді.
Алты турдан кейін 18 ұпай жинаған Қазақстан құрамасы турнир кестесінде бірінші орын алды. Олар бір тур бұрын әлем чемпионаты финалдық сатысына жолдамаға қол жеткізген еді.
Айта кетсек, ел құрамасы әлем чемпионатының финалдық сатысында 2000, 2016, 2021 жылдарда сынға түсті. Олар 2021 жылы 4-орынға табан тіреді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.