АСТАНА. KAZINFORM – 2019 жылғы әлем және Азия чемпионатының қола жүлдегері Милана Сафронова кәсіпқой боксқа ауысты.
Бұл туралы боксшы Instagram әлеуметтік желісіндегі парақшасында мәлім етті.
– Әлемдік ареналарда Отанымның туын жоғары көтеруді әрқашан армандадым. Бұл межеге кәсіпқой бокста да ұмтыламын. Қазақстаннан шыққан алғашқы абсолютті әлем чемпионы атану – басты мақсатым. Алғашқы жаттығу жиыным үздік бапкерлермен бірге Таиландта өтті. Қазіргі кезде Мәскеуге, мені әуесқой бокста чемпиондыққа жеткізген алғашқы жаттықтырушым Захар Семенович Рутенбергке оралдым. Ресми түрде кәсіпқой боксқа ауысамын. Жуырда бірінші жекпе-жегімнің мерзімін жариялаймын. Мықты командаммен бірге чемпион атанып, еліме барлық титулды әкелуге дайынмын, - деп жазды Сафронова.
Еске сала кетейік, бұдан бұрын бокстан Азия чемпионатында Қазақстан құрамасының нешінші орын алғаны белгілі болғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).