АСТАНА. KAZINFORM — Әлемнің 1-ракеткасы, италиялық Янник Синнер допингті пайдалануына байланысты Бүкіләлемдік антидопинг агенттігімен (BADA) өзіне қатысты үш ай мерзімге турнирлерге қатысуға тыйым салу туралы бейбіт келісімге отырды.
BADA ресми сайтынан алынған мәліметке қарағанда, Синнер бейбіт келісім шартына сәйкес шеттетілу мерзімін биылғы 9 ақпаннан бастап 4 мамыр күнгі сағат 23.59-ға дейін өтейтін болады. Дегенмен ол ресми жаттығуын 13 сәуірде бастай алады.
Осылайша, Синнер Индиан-Уэллс, Майами, Монте-Карло және Мадрид мастерс жарыстарына қатыса алмайды. Ал келесі «Үлкен дулыға» турнирі – 19 мамырда басталатын Франция ашық чемпионатында бақ сынайды.
Бұдан бұрын Спорттық арбитраж соты (CAS) Синнердің ісін қарап, Бүкіләлемдік антидопинг агенттігінің апелляциялық шағымына сәйкес түпкілікті шешімді 16-17 сәуірде қабылдайтыны хабарланған еді.
Италиялық спортшы өткен жылы да допинг дауына ілінген еді.
Еске сала кетейік, бұдан бұрын теннистен әлемнің бірінші ракеткасы допинг дауына қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).