ОРАЛ. ҚазАқпарат - Облыс прокуратурасы ғаламтор көздеріне мониторинг жүргізген кезде «Мұхтар» есімімен тіркелген тұлғаның әлеуметтік желіде өзге ұлтқа қатысты өзінің теріс пікірін білдіргені анықталды.
БҚО прокуратурасының баспасөз қызметінен түскен мәліметке қарағанда, аталған дерек бойынша ҚР ҚК 174-бабы 1-бөлімі бойынша сотқа дейінгі тергеу басталып, іс ҚР ҰҚК БҚО бойынша департаментіне жолданған.
«Мұхтардың» пікірлерін сараптау нәтижесі ұлтаралық араздық пен алауыздықты қоздыру, ұлттық ар-намыс пен қадір-қасиетті қорлау белгілерінің бар екенін көрсетті.
Тергеу барысында айыпталушы өз кінәсін толықтай мойындаған.
Сот үкімімен ҚР ҚК 174-бабы 1-бөліміне сәйкес кінәлі тұлғаның үш жылға бас бостандығынан шектеліп, осы кезеңге пробациялық бақылауға алынды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).