Әлеуметтік желі арқылы зорлық-зомбылық идеологиясын насихаттаған 6 адам ұсталды – ҰҚК
АСТАНА. KAZINFORM — Ұлттық қауіпсіздік комитеті деструктивті діни ағымның жақтаушылары болып табылатын Қазақстанның 5 азаматы мен 1 шетелдік ұстады.
Оларға өшпенділік пен зорлық-зомбылық идеологиясын әлеуметтік желілер және басқа да жолдармен таратты деген күдік келтіріліп отыр..
ҚР Ұлттық қауіпсіздік комитеті баспасөз қызметінің мәліметтеріне қарағанда, ұсталған адамдардан заттай дәлелдер табылды және алынды, оның ішінде 3 граната бар.
Күдіктілердің екеуі бұған дейін тонау және ұрлық әрекеттері үшін сотталған.
Ұсталған адамдарға қатысты Қылмыстық кодекстің 256-бабы бойынша сотқа дейінгі тергеп-тексеру жүргізілуде.
Қылмыстық-процестік кодекстің 201-бабының 1-бөлігіне сәйкес өзге ақпарат жария етуге жатпайды.
«Биылғы тамызда Ұлттық қауіпсіздік комитеті прокуратураның үйлестіруімен және полицияның көмегімен Алматы қаласында, Қарағанды, Түркістан, Ұлытау облыстарында терроризмге қарсы іс-шаралар өткізді»,-деп хабарлады ҚР ҰҚК баспасөз қызметі.