Алғашқы көміртек-14 ядролық батареясы Қытайда жасалды

АСТАНА. KAZINFORM — Қытайда көміртек-14 ядролық батареясының алғашқы прототипі — «Чжулун-1» сәтті әзірленді, деп хабарлайды Guangming Daily.

«Чжулун-1» прототипін Солтүстік-Батыс педагогикалық университеті мен Уси қаласындағы Beta медициналық технологиялар компаниясы бірлесіп әзірледі. Бұл әлем бойынша жартылай өткізгішті кремний карбиді мен жоғары белсенді көміртек-14 изотопы негізінде жасалған алғашқы ядролық батарея. Негізгі материалдарды әзірлеуден энергия түрлендіргіш құрылғыларын өндіруге дейінгі технологиялық үрдістің зияткерлік меншігі толықтай Қытайға тиесілі.

Зерттеушілер прототипті әзірлеу барысында жоғары белсенді көміртек-14 көзін алу, энергия түрлендіргіш құрылғысының тиімсіздігі мен тұрақсыздығы сияқты негізгі техникалық мәселелерді түбегейлі шешті.

Басылымның жазуынша «Чжулун-1» батареясымен қуатталған LED шамы 4 айдан бері үздіксіз жұмыс істеп тұр. Осы аралықта жалпы 35 000-нан астам импульстік жыпылықтау тіркелген. Сондай-ақ, ядролық батареяға қосылған энергия сақтағыш модул Bluetooth радиочипі арқылы сыртқы құрылғылармен сәтті сигнал алмасып келеді.

Көміртек-14 изотопының жартылай ыдырау мерзімі 5730 жылға созылатындықтан, теориялық тұрғыдан бұл ядролық батарея мыңдаған жыл бойы үзіліссіз қызмет ете алады.

Дәстүрлі энергия көздерімен салыстырғанда көміртек-14 ядролық батареясы -100°C-тан +200°C-қа дейінгі температурада жұмыс істей алады. 50 жылға дейінгі мерзім ішінде өнімділігінің төмендеуі 5%-дан аспайды. Сондай-ақ, құрамында ауыр металдар жоқ болғандықтан және химиялық реакция жүрмейтіндіктен, құрылғы улы заттар бөлмейді, қызып та кетпейді, литий-ионды немесе басқа да құрғақ батареяларға қарағанда әлдеқайда қауіпсіз.