Alibaba DeepSeek-пен тең дәрежеде бәсекелесе алатын жаңа жасанды интеллект моделін шығарды

АСТАНА. KAZINFORM – Alibaba компаниясының бөлімшесі ашық кодты жаңа QwQ-32B атты жасанды интеллект моделін шығарды, әрі оның өнімділігі DeepSeek-R1 моделіне тең екенін мәлімдеді. Бұл туралы Қытайдың The Paper басылымы хабарлады, деп жеткізеді Kazinform агенттігінің меншікті тілшісі.

QwQ-32B моделі небәрі 32 миллиард параметрден тұрады, алайда оның өнімділігі DeepSeek-R1 моделіне тең келеді. Айта кетсек, DeepSeek-R1 жалпы 671 миллиард параметрге ие, бірақ соның 37 миллиарды ғана белсенді.

Хабарланғандай, ауқымды күшейтілген оқыту процесінің арқасында QwQ-32B моделі математика, кодтау және жалпы қабілеттер бойынша сапалы серпіліске қол жеткізген.

Еске сала кетейік, DeepSeek атты қытайлық стартаптың 2025 жылдың қаңтарында DeepSeek-R1 жасанды интеллект чат-ботын іске қосуы әлемдік ІТ-нарықта «таңданыс» тудырған еді.

Айта кетелік DeepSeek-ті пайдалануға тыйым салғандардың қатары өсіп келетіні туралы жазған едік.