Алматы әуежайындағы жолдардың бірі уақытша жабылады
17:22, 14 Тамыз 2025
АЛМАТЫ. KAZINFORM — «Ақсұңқар» қонақ үйінің жанындағы пандусқа кіру жолы жөндеу жұмыстарына байланысты уақытша жабылады.
Алматы әуежайының мәліметінше, жөндеу жұмыстары аясында гидрооқшаулауды жақсарту, жылыту жүйесін жаңғырту және жаңа асфальт төсеу жұмыстары жүргізіледі.
— Жөндеу кезеңінде ескі пандусқа көтерілу жолы жаңа пандусқа ауысады. Туындаған уақытша қолайсыздықтар үшін кешірім сұраймыз, — деп хабарлады әуе айлағы.
Еске салайық, бұған дейін Алматы халықаралық әуежайын басқарушы TAV Airports компаниясы әуе айлағын 2050 жылға дейін дамытудың бас жоспарын таныстырды.
Ол бойынша 2025-2028 жылдар аралығында әуежай инфрақұрылымына 362 млн АҚШ доллары жұмсалмақ. Барлығы 130 жоба іске асырылады.