Алматы облысы сыбайлас жемқорлықпен күрес департаментіне жаңа басшы тағайындалды
АЛМАТЫ. KAZINFORM — Мемлекет басшысының келісімімен Қазақстан Республикасы Сыбайлас жемқорлыққа қарсы іс-қимыл агенттігінің төрағасының бұйрығымен Болат Серікпайұлы Жармақов Алматы облысы бойынша аумақтық департаментінің басшысы болып тағайындалды.
Алматы облысының әкімі Марат Сұлтанғазиев ҚР Сыбайлас жемқорлыққа қарсы іс-қимыл агенттігінің жаңадан тағайындалған Алматы облысы бойынша департаменті бастығын облыс активі жиналысында таныстырды.
«Мемлекет басшысы алдымызға қойған міндеттерді Сіздермен бірлесе отырып, жүзеге асырамыз деп сенемін. Қазіргі уақытта біздің елімізде сыбайлас жемқорлыққа қарсы күреске ерекше көңіл бөлінуде, бұл мемлекеттік саясаттың негізгі бағыттарының бірі. Осы жұмыста барлығымызға сәттілік тілеймін», — деді облыс әкімі.
Болат Жармақов 1986 жылы Қарағанды қаласында дүниеге келген.
2007 жылы Қаржы полициясы академиясын бітірді.
2003–2007 жылдары — ҚР Қаржы полициясы академиясының тыңдаушысы, 2007–2014 жылдары — Астана қаласы бойынша экономикалық қылмысқа және сыбайлас жемқорлыққа қарсы күрес департаменті (қаржы полициясы), 2014–2021 жылдары — Астана қаласы, Ақмола, Павлодар, Түркістан облыстары бойынша сыбайлас жемқорлыққа қарсы қызмет департаменттерінде басшылық лауазымдарды атқарды.
2021-2022 жылдары — ҚР Сыбайлас жемқорлыққа қарсы іс-қимыл агенттігі анықтау және жолын кесу қызметі басшысының орынбасары болды.
2022-2023 жылдары — ҚР Сыбайлас жемқорлыққа қарсы іс-қимыл агенттігінің анықтау және жолын кесу қызметінің басшысы қызметін атқарды.
2023 жылдың 15 желтоқсаннан бастап қазіргі уақытқа дейін — ҚР Сыбайлас жемқорлыққа қарсы іс-қимыл агенттігінің Алматы облысы бойынша департаменті басшысының уақытша міндетін атқарушысы болды.