Бүгінгі таңда қатты тұрмыстық қалдықтар полигонын сөндіру және қалпына келтіру жұмыстары жалғасып жатыр. Жекелеген учаскелерде 10 метрге дейінгі тереңдікте бықсу байқалады.
— Өрт ошақтарын сөндіру үшін инертті материалдар қолданылып жатыр. Жел бағытының жиі өзгеруі қосымша қиындықтар туғызып отыр. Полигонның ауданы бойынша соқамен жырту жұмыстары жүргізілді. Барлығы 7 өрт сөндіру учаскесі құрылды, — делінген ведомство хабарламасында.
Оқиға орнында Алматы облысы ТЖД бастығы, полковник Дәурен Оразбековтің басшылығымен жедел штаб құрылды.
Өртті сөндіру жұмыстарына Алматы облысы, Алматы қаласы ТЖД, ТЖМ 28237 әскери бөлімі, жергілікті атқарушы органдар, «Қазселденқорғау» және Алматы қаласы ТЖД Құтқару қызметінің 120-ға жуық адамы мен 60-тан астам техникасы жұмылдырылды. Өрт сөндіру аймағына суды үздіксіз жеткізу үшін Тереңқара өзеніне сорғы-жеңді автомобиль орнатылды. Құтқарушылар диаметрі 77 мм 70 жеңнен тұратын магистральды желі тартты, оған 6 техника жұмылдырылған.
— Бұл шаралар өртті тиімді сөндіру үшін қажетті қысым мен судың жеткілікті мөлшерін қамтамасыз етуге мүмкіндік береді. Жағдай Төтенше жағдайлар министрлігінің бақылауында. Өрттің жақын маңдағы аумақтарға таралу қаупі жоқ, — делінген таратылған ақпаратта.
Осыдан бұрын өрт шыққан кәсіпорынға бұрын заң бұзғаны үшін айыппұл салынғаны анықталды.