Алматы зообағы 2028 жылы жаңартылып бітеді
АЛМАТЫ. KAZINFORM — Алматы зообағын жаңарту жұмыстары кезең-кезеңімен 2028 жылға дейін жүзеге асады. Бұл туралы қалалық мәдениет басқармасы Kazinform сауалына жолдаған жауапта айтты.
Басқарма мәліметінше, алдағы уақытта зообақ жұмысын заман талабына сай қайта жандандырып, аң-құстарды ұстау жағдайын халықаралық талаптарға сәйкес жақсарту жоспарланып отыр.
Осы мақсатта Алматы қаласының аумағын дамыту жоспары аясында зообақты халықаралық стандарттарға сәйкес зоогеографиялық принцип бойынша қайта жаңғырту көзделген.
— Биыл жобалық-сметалық құжаттаманы әзірлеуге конкурс жарияланады. Қажетті конкурс рәсімдері мен сараптама қорытындысы шыққан соң мемлекеттік сатып алу туралы заңға сәйкес конкурс нәтижесі көпшілікке қолжетімді болады. Жалпы реконструкция жұмысы кезең-кезеңімен 2028 жылға дейін жүзеге асырылады, — деп жазылған басқарма жауабында.
Қазақстанның ең көне хайуанаттар бағының бірі — Алматы зообағы. 21 гектар жерді алып жатқан зообақ 1937 жылы құрылған.
Зообақта жануарлардың 361 түрі бар. Жалпы саны — 3 838. Оларды 223 қызметкер күтіп-бағады.
Былтыр аң-құстарды тамашалауға 1 млн астам адам келді.
Еске салайық, осыған дейін Алматы зообағы Алатау қаласының аумағына көшірілетіні жайлы ақпарат пайда болған еді.