Бұл туралы Алматы қалалық ПД ресми өкілі Jibek Joly арнасының «Бүгін LIVE» бағдарламасына берген онлайн сұхбатында хабарлады.
Профилактикалық кешенді шара 21 наурыз күні болған қайғылы жағдайдан кейін ұйымдастырылған.
— Оқиғадан кейін профилактикалық кешенді іс-шаралар жүргізілді. Еліміздің 4 өңірінен 20 полиция экипажы жұмылдырылды. Олар бір апта бойы Алматы қаласында қызмет етіп, кейін өз өңірлеріне қайтып кетті. Қазір ахуал тұрақты, — деді Салтанат Әзірбек.
Спикер Алматыдағы көлік қозғалысының жоғары екенін айтып, жолдағы жауапкершілік әр жүргізушіге байланысты екенін жеткізді.
— Алматы қаласы еліміздегі ең ірі мегаполис болғандықтан, күніне 1,5 млн-ға жуық көлік кіріп-шығады. Күн жылығаннан бастап халық электромобильдерді де қарқынды түрде пайдаланып жатыр. Сол себепті өзге өңірлерге қарағанда мұнда жол ахуалы күрделірек. Сондықтан жол қозғалысына қатысатын әрбір азамат жеке жауапкершілікті сезінуі тиіс, — деді ол.
Сондай-ақ полиция өкілі «STOP бұзушылық» іс-шарасы барысында анықталған құқық бұзушылықтар статистикасын жариялады.
— 10 күн бойы «STOP бұзушылық» атты кешенді іс-шара жүргіздік. Осы кешенді іс-шара жүргізілген 10 күн ішінде 16 576 азамат жауапкершілікке тартылды. 2 мыңнан аса жылдамдықты асыру дерегінің жолы кесілді, 70-тен аса мас жүргізуші тізгіннен шеттетілді. Олар әкімшілік қамауға алынды. Сот шешімімен 7 жылға көлік жүргізу құқығынан айырылды. Былтырмен салыстырғанда жол-көлік оқиғаларының саны 12 пайызға төмендеді, — деді Салтанат Әзірбек.
Оның сөзінше, Алматыда агрессивті жүргізушілерді анықтау үшін жасырын патрульдеу тәсілі енгізілген.
— Полиция қызметкерлері ешқандай белгісі жоқ қызметтік көлікпен жүріп, агрессивті жүргізушілерді анықтайды. Кейін рация арқылы олардың мәліметін беріп, жақын маңдағы патрульдік экипаждар тосқауыл қояды. Осы жасырын профилактикалық шара барысында 5 күн ішінде 68 қауіпті жүргізуші анықталды. Олар — 20-35 жас аралығындағы азаматтар, — деді спикер.
Сонымен қатар Алматыда түнгі уақытта фильтрациялық бекеттер де енгізілген.
— Түнгі уақытта Әл-Фараби даңғылы бойында 80 км/сағ жылдамдықпен келе жатқан көлік ағынына арнайы жол белгілері қойылып, жылдамдық 80-нен 60-қа, 60-тан 40 км/сағ-қа дейін төмендетілді. Осылайша көліктерді бір қатарға тізіп, тексеруге мүмкіндік болды. Егер жүргізушінің іс-әрекеті күдік тудырса, оны дереу тоқтатып, тексереміз. Осы шараның нәтижесінде бірнеше мас жүргізуші ұсталды, — деді полиция департаментінің ресми өкілі.
Айта кетейік, Ақтөбеде жыл басынан бері жол-көлік апатынан 27 адам көз жұмған.