Алматыда әлеуметтік қызмет көрсету орталықтары қызметкерлерінің жалақысы өсті

АЛМАТЫ. KAZINFORM – Алматыда әлеуметтік саладағы көмекші персоналдың жалақысы 30 пайызға артты. 

Алматы әкімі Ерболат Досаевпен кездесу барысында Әуезов ауданы тұрғындарының бірі жергілікті әлеуметтік қызметтер орталығы мамандарының жалақысы туралы мәселені көтерді.

Өз кезегінде Ерболат Досаев биыл алғаш рет әлеуметтік қамсыздандыру және білім беру саласының әкімшілік және көмекші персоналының, сондай-ақ ведомстволық бағынысты әлеуметтік мекемелер қызметкерлерінің жалақысы 30%-ға артқанын атап өтті. 

– Бастамамды қалалық мәслихат депутаттары қолдады, ол үшін мен оларға ризамын. Менің ойымша, алғашқы қадамдар жасалды және осылайша біз адамдарды өз орындарында, әсіресе әлеуметтік қызмет көрсету орталықтарында жақсы жұмыс істеуге ынталандырдық. Жыл сайынғы қаржыландыру үнемі артып келеді, Мен оны қадағалап отырамын, - деді ол. 

Айтуынша, 2015 жылдан бері алғаш рет медициналық-әлеуметтік мекемелердің қызметкерлеріне, медициналық персоналды қоспағанда, лауазымдық жалақыға 30% мөлшерінде ынталандыру үстемеақысы белгіленді. Соның арқасында 1 632 қызметкер үстемеақы алады. 

Еске салайық, бұған дейін Алматыда әлеуметтік, медициналық және білім саласы қызметкерлерінің жалақысы өсетіні туралы жазғанбыз.