Алматыда Бауыржан Момышұлы көшесінің бір бөлігі жабылады

АЛМАТЫ. KAZINFORM — Алматыда 18 мамырда BI Run қайырымдылық жарысы өтеді. Осыған байланысты 18 мамыр күні сағат 07:00–ден 12:00–ге дейін жарыс өткізілетін ауданда көлік қозғалысына уақытша шектеулер қойылатын болады.

— Бауыржан Момышұлы көшесінің (оңтүстік бағытта) Мөңке көшесінен (Бигвилль Arena City ТК) Almaty Arena-ға дейінгі учаскеде бір автобус жолағы және жеңіл автомобильдерге арналған бір жолақ жабылады. Осы бағыттағы қалған жолақ штаттық режимде жұмыс істейтін болады, — деп хабарлады Спорт басқармасынан.

Сондай-ақ Almaty Arena аумағындағы айналма көше толық жабылады. Бұл учаскеде 5 және 10 км қашықтықта қауіпсіз жүгіру маршруты ұйымдастырылады.

— Қашықтықтағы қауіпсіздікті жол полициясының қызметкерлері мен еріктілер қамтамасыз етеді. Тұрғындар мен автокөлік иелерінен уақыт шектеулерін ескере отырып, маршрутты алдын ала жоспарлауды сұраймыз, — делінген хабарламада.

Еске салайық, бұған дейін Бұқар Жырау көшесінің бір бөлігі маусым айына дейін жабылғаны туралы жазғанбыз.