Алматыда BRT құрылысы кезінде бүлінген жиектер ғана ауыстырылады
АЛМАТЫ. KAZINFORM — Алматыда BRT құрылысы кезінде қайта пайдалануға болмайтын бүлінген жиектер ғана ауыстырылады.
Алматы қалалық мобильділік басқармасы жол жөндеу жұмыстары кезінде көше бойындағы жиек тастар қандай жағдайда ауыстырылатынын түсіндірді.
— Көбіне жол апаты кезінде бордюрлер зақымдалып немесе жылжып кетіп жатады. Соның салдарынан жиек таспен, асфальтта жарықтар пайда болады. Бұл жолдың беріктігі мен сапасын төмендетеді, — деп атап өтті басқармадан.
Сондықтан осындай олқылықтарды болдырмау үшін асфальтбетон жабынын төсеу арқылы жолдардың пайдалану сипаттамасы бойынша бір деңгейде орнатылған жиектер болуы шарт.
— Алайда тегістеу оларды ауыстыруды білдірмейді, өйткені бүкіл шекара белгілі бір деңгейге қайта орнатылады. Тек ақауы бар зақымдалған жиектер ауыстырылады. Көшелерді орташа жөндеу барысында жиектердің шамамен 3 пайызы өзгереді — бұл қала бойынша орташа көрсеткіш, — делінген хабарламада.
Райымбек батыр даңғылында BRT желісін салу кезінде тек зақымдалған жиектерді ауыстыру жүзеге асырылады. Олардың дәл саны ақау нәтижелері бойынша анықталады.
Бұған дейін Райымбек даңғылында BRT құрылысы басталатыны туралы жазған едік.
BRT желісінің жалпы ұзындығы — 17 шақырым. Оның 9 шақырымын Пушкин мен Ахрименко көшелерінің аралығында салу жоспарланған. Жоба аясында автобустарға арнайы жолақтар салынып, жаңа аялдама кешендері орнатылады.