Алматыда Гагарин даңғылының бір бөлігіне Ермек Серкебаевтың есімі берілмек

АЛМАТЫ. KAZINFORM – Алматыда қала әкімдігі мен мәслихаттың мегаполис көшелерінің атауын өзгерту және оларға есім беру туралы бірлескен қаулысының жобасы көпшіліктің талқылауына ұсынылды. 

Гагарин даңғылының тарихи бөлігі өзгеріссіз қалады. Құжатта Төле би көшесінен Жандосов көшесіне дейінгі аралықтағы даңғылдың бульварлық бөлігі туралы айтылған. Ю. Гагарин атындағы даңғылдың бір бөлігін - К. Тимирязев көшесінен Ермек Серкебаевтың есімімен атау жоспарланып отыр. 

«Белгілі болғандай, бірінші ғарышкер, Кеңес Одағының батыры Юрий Гагариннің есімімен шартты түрде «13-линия» деген көше аталды. Оның негізгі бөлігі қазіргі Төле би (бұрынғы Комсомольская 1991 жылға дейін) және Жандосов (бұрынғы Қарғалы тас жолы 1964 жылға дейін) көшелерінің шегінде болды. Шешімді 1961 жылғы 14 сәуірдегі Алматы қалалық атқару комитеті қабылдаған болатын. Төле би көшесінен Ю. Гагарин даңғылының негізгі, бульварлық бөлігі Жандосов көшесінде үзіліп, тек 2 кварталдан немесе 560 метрден кейін жалғасады. Сонымен қатар бұл аймақта жаяу жүргіншілер немесе басқа жолдар жоқ. Осы жағдайды, сондай-ақ қаланың өсіп келе жатқан халқын ескере отырып, заманауи қалалар жағдайында тұрғындар, қонақтар мен туристер үшін навигация күрделене түсетінін ескеру қажет», - деп атап мәслихаттан.

Депутаттар Ермек Серкебаевтың есімін даңғылдың бір бөлігіне беру оның ерекше еңбегінің ақталғанын көрсетеді деп отыр.

Е. Серкебаев – Абай атындағы Қазақ мемлекеттік академиялық опера және балет театрының солисі, КСРО мен Қазақстанның халық әртісі. Қазақ, орыс және басқа тілдердегі классикалық және кеңестік шығармалардың көрнекті қазақстандық әншісі, халық әндерінің, романстардың және бас опера партияларының орындаушысы. Мысалы, Абай, Онегин, Князь Игорь және тағы басқа партияларды шырқаған. 50-ден астам елде концерт өткізді. Оның репертуарында қазақ әндерімен қатар «Надо мной небо синее», «На безымянной высоте», «Севастопольский Вальс», «Песня о Москве» сынды өзге халықтардың да әндері болды. 

Бұдан өзге, Әуезов ауданындағы Юбилейная көшесіне Владимир Толоконников атын Бостандық және Түрксіб аудандарындағы атаусыз көшелерге Ескендір Хасанғалиев пен Юрий Померанцевтің есімдерін беру ұсынылды. 

Владимир Толоконников – актер, Қазақстанның еңбек сіңірген әртісі, Алматыда шамамен елу жылдай М. Лермонтов атындағы Мемлекеттік академиялық орыс драма театрында жұмыс істеді. Қырықтан астам фильмге түскен өнер шебері. Юбилейная көшесінде бір кездері В. Толоконниковтың өзі отбасымен бірге өмір сүрген. 

Ескендір Хасанғалиев – әнші, композитор, Қазақстанның Халық әртісі, Қазақстан Республикасы Мемлекеттік сыйлығының лауреаты. «Анаға сәлем», «Асыл арман», «Әдемі-ау», «Сағындым сені», «Гүл сезім» және т. б. әндердің авторы.

Юрий Померанцев – актер, режиссер, педагог, Қазақстанның Халық әртісі. Елуінші жылдардан бастап «Біздің сүйікті дәрігер» фильмінде ойнап, барлық қазақстандықтың сүйіктісіне айналған еді. 

Еске салсақ, қаулы жобасы осы жылдың 28 мамырына дейін талқылау үшін ашық НҚА порталында болады. 

Бұған дейін мегаполисте бірнеше көшеге белгілі өнер қайраткерлерінің есімі берілетіні туралы жазған едік.