Алматыда Республика күніне орай төрт жаңа мектеп ашылды
АЛМАТЫ. KAZINFORM - Алматыда Республика күні қарсаңында 8 мың оқушыға арналған жаңа мектептер ашылды.
Алматы әкімдігінің хабарлауынша, биыл мегаполис тарихында алғаш рет бір оқу жылында 24 жаңа мектеп ашылады.
Алматыда Республика күніне орай бірден төрт заманауи жалпы білім беретін мектеп салтанатты түрде ашылды. Солардың бірі – Медеу ауданында орналасқан, жобалық қуаты 2 мың оқушыға арналған №220 жалпы білім беретін мектеп.
-Бұл жалпы білім беретін мектеп осы аймақтағы орын тапшылығын толық жабады. Жалпы, 1 қыркүйектен бері қалада 12 жаңа мектеп ашылды. Республика күніне орай осы аптада тағы төрт білім беру мекемесі пайдалануға беріледі. Бесінші мектеп – қараша айында, ал тағы сегізі – жыл соңына дейін «сатып алу» тетігі арқылы іске қосылады, – деді Алматы қаласы әкімінің орынбасары Азамат Қалдыбеков.
Оның айтуынша, мегаполисте биылғы оқу жылында барлығы 24 мектеп ашылады, соның ішінде 21 мектеп «Келешек мектептері» ұлттық жобасы аясында салынып жатыр.
-Бұл тарихи максимум. Бұған дейін бір оқу жылында мұншама жаңа мектеп пайдалануға берілмеген. Мұның барлығы Қазақстан Президенті Қасым-Жомарт Тоқаев бастамашы болған «Келешек мектептері» ұлттық жобасының арқасында жүзеге асты, – деді Азамат Қалдыбеков.
№220 мектеп заманауи үлгіде салынған, оның құрамында 83 оқу кабинеті, 4 спорт залы, сондай-ақ асхана, кітапхана, медициналық пункт, конференция залы, спорт алаңы, теннис корты, волейбол және баскетбол алаңдары бар.
-Ғимарат қозғалысы шектеулі адамдар үшін толық бейімделген. Барлық кабинет интерактивті тақталармен және оқу материалдарымен жабдықталған. Оқушылардың қауіпсіздігін қамтамасыз ету үшін бейнебақылау жүйелері мен дабыл батырмалары орнатылған, – деді мектеп директоры Манат Әшірбекова.
Айта кету керек, Республика күніне орай Алматыда Наурызбай ауданындағы Құрамыс шағынауданында орналасқан №219 жалпы білім беретін мектеп те есігін айқара ашады. Білім ордасында 1 500 оқушыға арналған 79 оқу кабинеті бар. Биыл 1-сыныпқа 80 оқушы қабылданды. Оқу-тәрбие үдерісін 26 педагог жүргізеді.
Сондай-ақ Наурызбай ауданының Шұғыла шағынауданында орналасқан №221 жалпы білім беретін мектеп жұмысын бастайды. Білім ордасында 2 500 оқушы орнын қамтитын 125 оқу кабинеті бар. Бүгінде 1 722 оқушы қабылданған. Оқу-тәрбие үдерісін жоғары кәсіби деңгейге ие 74 педагог қамтамасыз етеді.
Бұдан бөлек, Алатау ауданында орналасқан №222 жалпы білім беретін мектеп те ашылады. Білім ордасында 2 мың оқушы орнын қамтитын 96 оқу кабинеті бар. Бүгінде 700 оқушы қабылданды. 1-сыныпқа 41 бала қабылданған. Білім беру үдерісін 44 педагог жүргізеді.
Барлық жаңа мектеп заманауи жабдықтармен, кең сыныптармен, спорт және шығармашылық залдармен, сондай-ақ еңбек кабинеттерімен қамтамасыз етілген. Білім беру ұйымдары осы оқу жылының екінші тоқсанынан бастап оқушыларды қабылдауға толық дайын.
Алматы қаласының дамуы аясында жергілікті бюджет есебінен 550 орындық тағы бір мектептің құрылысы жүргізіліп жатыр, сондай-ақ Алатау ауданында 900 орындық «Абыро́й» жеке мектебін және Наурызбай ауданында 1 200 орындық жаңа жеке мектепті сатып алу жоспарланып отыр.