Алматыда жер сілкінді: құтқарушылар сейсмикалық оқу-жаттығу өткізді
АЛМАТЫ. KAZINFORM – Алматыда төтенше жағдай мамандары жойқын жер сілкінісі болған жағдайда қалай әрекет ету керектігін пысықтады.
Алматыда таңғы сағат 10:00-де қосылған дабыл шаһар тұрғындарын елең еткізді. Бұл құтқару қызметінің зілзалаға дайындығын пысықтау болатын. Жалпы қалалық оқу-жаттығу кезінде мектеп оқушылары сыртқа шығарылып, эвакуациялық нүктелердің мүмкіндігі тексерілді.
Қалады шартты түрде жер сілкінді. Жағдай күрделі. Өрт шығып, түрлі апаттар болды. Құтқарушылар жедел қимылдап, тұрғындарды қауіпсіз жерге шығару өртті сөндіру және адамдарды құтқару жұмыстарына кірісті.
Алматы гарнизонының әскери қызметшілері мүмкіндігі шектеулі адамдарды қауіпсіз орындарға эвакуациялады.
Құлагер шағынауданының көппәтерлі тұрғын үйінде өртті сөндіру бойынша авариялық-құтқару жұмыстары жүргізілді.
Орталық стадионда лагерь, далалық ас үй, сондай-ақ медициналық көмекке арналған модульдік медициналық госпиталь орналасты.
Алматы қалалық төтенше жағдайлар департаменті хабарлағандай, сейсмикалық оқу-жаттығудың негізгі мақсаты – қала тұрғындарының төтенше жағдай кезіндегі іс-қимылға дайындығын арттыру, тұрғындарды эвакуациялау жолдарын, қауіпсіз жерлерді алдын ала анықтап, апаттық чемодан дайындау болды.
Жаттығуға азаматтық қорғау қызметтерінің және Алматы гарнизонының әскерелерінің жеке құрамынан 1100 адам мен 60 техника тартылды.