Алматыда жыл басынан бері 1 млн 866 мың 741 жол ережесін бұзу дерегі анықталды. Бұл туралы Алматы қалалық полиция департаментінің жергілікті полиция қызметі басқармасы бастығының орынбасары, полиция полковнигі Серік Шумаев айтты, деп хабарлайды Kazinform.
«Көлікті мас күйінде басқарған 1 843 жүргізуші ұсталды. Сот 2 443 жүргізушіні көлік құралын басқару құқығынан айырды. 1 754 көлік жүргізушісі әкімшілік қамауға алынды. Естеріңізге сала кетейін, заңда көлікті мас күйінде басқарғаны үшін жаза қатайтылды. Бірінші рет болса көлік құралын басқару құқығынан айыру мерзімі - 7 жыл. Сонымен қатар 15 тәулікке дейін әкімшілік қамауға алу қарастырылған», - деді Серік Шумаев.
Сонымен қатар, Жергілікті полиция қызметінің мәліметінше қала жолдарында жыл басынан бері 3 195 жол апаты тіркеліп, салдарынан 3 415 адам зардап шегіп, 94 адам қаза тапқан.
Думан Арғынгелді
2008 жылы Әл-Фараби атындағы Қазақ ұлттық университетінің журналистика факультетін тәмамдаған. «Қазақстан» ұлттық арнасының Алматы қалалық филиалында, «Аягөз жаңалықтары», «Алматы ақшамы» газеттерінде қызмет атқарды. Мақалалары республикалық, облыстық, аудандық газет беттерінде жарияланды. 2021 жылдан бері «KAZINFORM» ХАА-де жұмыс істейді.