Алматыда Жошы туралы фильмнің премьерасы болды
АЛМАТЫ. KAZINFORM — Алматыда «Жошы хан. Ұлы ұлыстың әміршісі» атты деректі-көркем фильмнің жабық көрсетілімі өтті.
Белгілі журналист, продюсер Майя Бекбаеваның бастамасымен Қазақстан Республикасы Президенті Телерадиокешенінің қолдауымен түсірілген фильм 20 наурызда еліміздің барлық кинотеатрында жарыққа шығады.
— Жошының оқиғасы бірегей әрі ерекше. Біз фильмде қай заманнан жойылмаған қазақ мемлекеттілігіне баса назар аударып, оның жоқтан пайда болмағанын көрсеткіміз келді.
Былтыр Ұлттық Құрылтайда Президент 2024 жылы Алтын Орда мерейтойын атап өтуі тиіс екенін және бүгінгі Қазақстан Алтын Орданың мұрагері екенін айтқан соң, біздің команда Жошы туралы фильм түсіру керек екенін түсінді. Көпшілігіміз Ақсақ құлан туралы аңызды білеміз, ол жылдар бойы ауыздан-ауызға тарады. Тарихи тұлғаның өмірі, туылуы мен өлімі құпияға толы. Сондықтан біз шығармашылық адамдары ретінде дәл осы тақырыпты ашуға қызығушылық таныттық, — деді Майя Бекбаева.
Фильмді түсіру үшін кино команда белгілі түркітанушы Тимур Козыревпен кеңесіп, сол кісінің көмегімен диалогтарды түркі және моңғол тілдерінде жазған.
Фильмде бұл диалогтар сақтала отырып, орыс тіліне дубляждалған.
Сондай-ақ қазақ тілінде субтитрлер қойылған.
Фильмде бас кейіпкер — Жошы ханның рөлін жас актер Шынғыс Бейбітұлы сомдады.
Ал Шыңғыс хан рөлінде талантты актер Болат Ұзақов түсті.
Кинотуындының түсірілімі Астанада және оның айналасындағы ауылдарда өтті.
Фильмнің саундтрек әндерін Майя Бекбаева жазды.
Бұл оның композитор ретіндегі алғашқы тәжірибесі болды.
Еске салайық, бұған дейін 20 наурыздан бастап Жошы хан туралы фильм кинотеатрларда көрсетілетінін жазғанбыз.