Алматыдағы «Горельник» термалды бұлағының тазалығына кім жауапты

АЛМАТЫ. KAZINFORM – Әлеуметтік желіде Алматыда орналасқан «Горельник» термалды бұлағының жағдайы нашар екені көрсетілген бейнежазба тарады. Алматы әкімдігінің баспасөз қызметі бұл шағымға жауап берді.

Қала әкімдігі «Горельник» термалды бұлағының тазалығына алматылық кәсіпкер, меценат Сергей Спицын жауапты екенін және ыстық бұлақтың жағдайы нашар екені жайлы ақпарат жалған екенін хабарлады.

– Бизнесменнің айтуынша, бейнежазба бірнеше ай бұрын түсірілген. Сол кезде бұлақ аумағын тазалау және оны таза ұстау мәселесін экобелсенді дереу шешкен. Қазір меценат тәртіпті қадағалауды жалғастырып отырғанын айтып, жақында мұнда дәретхана салуға уәде берді, - деп хабарлады әкімдіктен.

Айта кетейік, «Горельник» ыстық бұлағы «Медеу» мұз айдыны мен «Шымбұлақ» тау шаңғысы курортының арасында теңіз деңгейінен 1 901 метр биіктікте орналасқан.