Қала орталығында тақырыптық алаңдар ұйымдастырылып, қонақтарға фермерлік өнімдер, қолөнер бұйымдары, гастрономия, музыка және бүкіл отбасыға арналған түрлі ойын-сауық түрлері ұсынылды.
Фестивальдің басты ерекшеліктерінің бірі – алма. Мерекеге орай танымал сорттардан бастап сирек кездесетін және әйгілі алматылық апорт, жалпы 200 тоннадан астам алма жеткізілді.
16-Alma Qala фестивалі Панфилов пен Қазыбек би көшелерінің қиылысында өтіп жатыр. Мұнда Алматы агломерациясының фермерлік шаруашылықтары өз өнімдерін таныстырады. Келушілер алманың түрлі сорттарынан дәм татып, сатып ала алады.
Фестиваль 10 тақырыптық аймаққа бөлінген. Ұлттық аймақта фольклорлық ұжымдар, этникалық ансамбльдер мен күй орындаушылары өнер көрсетеді. Театр сахнасында Алматы театрлары спектакльдер қойып, балаларға арналған қойылымдар мен әдеби оқулар ұйымдастырылды.
Кішкентай қонақтарға да арнайы алаң қарастырылған. Мұнда аниматорлар жұмыс істеп, түрлі ойындар мен шығармашылық шеберлік сабақтары өтеді.
Қолөнершілер аймағында 50-ден астам өндіруші мен шығармашылық кәсіпкер өз бұйымдарын ұсынып жатыр. Келушілер шеберлердің жұмыстарын тамашалап қана қоймай, тоқу, сурет салу, мүсіндеу, ағаш ою және әшекей бұйымдар жасау бойынша өздерін сынап көре алады.
Фестивальдің гастрономиялық бөлігінде жергілікті өндірушілердің өнімдері ұсынылған. Сөрелерде тосап, джем, пастила, кептірілген жемістер, алма чипстері, бал, құрт және басқа да жергілікті өнімдер бар.
Жеке алаң цифрлық технологияларға арналған. Мұнда Алматының цифрлық музейі жасалып, технологиялардың дамуымен бірге қаланың қалай өзгеріп жатқаны туралы ақпарат беріледі.
Ұйымдастырушылар экологиялық мәселелерге де назар аударған. Эко-аймақта келушілерге қалдықтарды сұрыптау және қайта өңдеу, сондай-ақ «Таза Қазақстан» бағдарламасы аясындағы қалалық экологиялық бастамалар туралы айтылады. Жанында оннан астам ұйым қатысатын волонтерлер станциясы жұмыс істейді.
Музыкалық бағдарлама да мерекенің маңызды бөлігіне айналды. Фестивальдің алғашқы күнінде қонақтар алдында Али Оқапов, Мәди Рымбаев, Нұрғалім Аманбай, Нұрмұхаммед Жақып, Акерке Амалят, Кәрім Мутурғанов, Жас-Мұқасан және ILIGAI өнер көрсетті.
Alma Qala фестивалі 20 қыркүйекке дейін жалғасады. Келушілерді әртістердің өнер көрсетуі, тақырыптық алаңдар, жергілікті өндірушілердің жәрмеңкесі және Қала күніне арналған мерекелік бағдарлама күтеді.
Қаланың негізгі алаңдарына кіру тегін.
Еске салайық, бұған дейін Алматыда қала күні қалай атап өтілетінін хабарладық.