Қалалық әкімдіктің мәліметінше, Алатау ауданына қарасты 11 шағын ауданда инженерлік желілерді дамыту аясында биыл бірқатар жобаны жүзеге асыру жоспарланған.
Қазір олардың біразында құрылыс-монтаж жұмыстары басталды. Алғабас шағын ауданында су құбыры мен кәрізді төсеудің 3 кезеңі басталды. Бұл 584 тұрғын үйде 4 мыңға жуық адамды қамтамасыз етуге мүмкіндік береді. Сонымен қатар ол аяқталғаннан кейін Қожабеков пен Ф.Оңғарсынова көшелеріне асфальт төсеу көзделген.
«Шапағат» шағын ауданында 2,5 мыңға жуық адамды сумен жабдықтау және кәріз жүйесімен қамтамасыз ету мақсатында 449 тұрғын үйде жобаның 2-ші кезегіндегі құрылыс-монтаж жұмыстары жүргізіліп жатыр.
«Рахат-Мәдениет» шағын ауданында жұмысты аяқтау 2025 жылға жоспарланған. Бұл 2882 тұрғын үйде 14 мыңнан астам адамды қамтамасыз етуге мүмкіндік береді.