Бұл туралы бүгін елордада ҚР Экономикалық қылмысқа және сыбайлас жемқорлыққа қарсы күрес агенттігінің ресми өкілі Мұрат Жұманбай мәлім етті.
«Ыдырысов пен Мұхамеджан «Алматы» халықаралық әуежайы» АҚ-ның жаңа жолаушылар терминалы құрылысына бөлінген 1 млрд. 167 млн. теңге қаржысын ұрлады деп айыпталып отыр», - деді ол.
Ресми өкілдің атап өтуінше, Ыдырысов сондай-ақ рейстік ұшақтарда борт тамағының бағасын жоғарлату арқылы 1 млрд. теңгеден астам қаржыны жымқырды деп те айыпталуда. Аталған екі азаматқа да сот санкциясымен іздеу жарияланды.
«Алматы» халықаралық әуежайы» АҚ бас бухгалтері Гамазоваға, «Эй Си Эс» және «Эй Ти Эс» ЖШС-ларының бұрынғы директоры Шамсудиновқа, «Эй Си Эс» ЖШС-нің бұрынғы бас бухгатері Биляноваға және осы мекеменің қызметкері Игнатоваға ҚР «Бухгалтерлік есеп және қаржылық есептілік туралы» Заңнамасын бұзып, алдау арқылы 1 млрд. теңгеден астам шығын келтірді деген айыптар тағылды.
«Гамазова мен Шамсудинов сот санкциясымен тұтқындалды», - деді ресми өкіл.