Жергілікті кәсіпкерлердің қолдауымен тұрғызылған бұл ескерткіште нәресте көтерген ана бейнесі мен бесік сомдалған. Тұғырға «Анаңды Меккеге үш рет арқалап апарсаң да, қарызыңнан құтыла алмайсың», «Әйел бір қолымен бесікті тербетсе, бір қолымен әлемді тербейді» деген халық даналығы жазылған. Тұғырдың биіктігі 3 метр, ал ана мүсінінің биіктігі 4 метрге жетеді. Ескерткіштің тұғыры Күртінің гранитінен қаланса, мүсін қоладан құйылған.
"Оны жасауға жарты жылдай уақыт кетті. Бұл менің ана тақырыбы бойынша жасалған екінші туындым. Алғашқысы биыл маусым айында ҚР Тұңғыш президенті қоры саябағына қойылған болатын", дейді мүсінші Елдос Бексұлтан.
Оның айтуынша, қазір елімізде ана тақырыбында салынған ескерткіштер аз. Ана мүсіні қамтылған ескеркіштердің көбі басқа тақырыптар аясына шоғырланған. Алматыдағы Тәуелсіздік монументі мен Желтоқсан көтерілісі құрметіне қойылған ескерткіштерде де осындай жағдай көрініс тауып отыр. Жалпы елімізде бұл тақырыпта салынған дербес ескерткіш мүлде жоқ деуге де болады.