Алматы әкімінің мәліметінше, қазір Алматыда орта білім беру саласында 291 мектеп жұмыс істесе, оның 207-сі мемлекеттік мектеп. «Барлығы 303 110 оқушы білім алады. Бұл өткен оқу жылымен салыстырғанда 12 мыңнан астам оқушыға артық. Бүгінде оқушы орны тапшылығы – 33 812», - деп жазады Бақытжан Сағынтаев.
Оның айтуынша, қала мектептерінде оқушылардың орын тапшылығы мәселесін шешу үшін келесідей жұмыстар атқарылуда.
«Бұл мәселені шешу үшін «қадамдық қолжетімділік» қағидаты аясында 12 600 орынға арналған 8 мемлекеттік мектептің құрылысы жүргізілуде. Соның ішінде 5100 орынға арналған 3 мектеп биыл желтоқсан айында пайдалануға беріледі.
8263 орынға арналған мектепке жапсарлас 17 жаңа корпустың құрылысы жалғасуда. Бұл ретте 4600 орынды 11 корпустың құрылыс-монтаждау жұмысы бітті. Қалған 3663 орынды 6 ғимараттың құрылысы биыл жыл соңына дейін аяқталады. Жаңа оқу жылының басында жеке инвестиция есебінен 2656 орынды 13 жекеменшік мектеп ашылды», - деп жазды шаһар басшысы.